Conto Pidarta Bali

Ulang Tahun STT Yowana Mandala

"Om Swastiastu"

Mantuk ring para manggala praja makadi Bapak Prabekel
Bapak Kelian Dinas utawi sane ngangganin dane sane bhaktinin titiang
Para manggala desa makadi Bapak Bendesa Adat Prajuru Adat
Bapak Kelian Adat Banjar sane kusumayang titiang
Para Ketua Truna Truni sinamian sawewengkon Desa Pakraman Buruan sane wangiang titiang
Para truna truni Yowana Mandala Banjar Buruan Kaja sane tresnasihin titiang

Kaping ajeng titiang ngaturang suksmaning manah ring sapengrauh ida dane para manggala taler para sameton sinamian, sane sampun parama ledang nodia pakaryan titiang sajeroning wanti warsa sane kaping dasa Sekaa Truna Truni Yowana Mandala Banjar Buruan Kaja rahinane mangkin.

Kaping kalih titiang nenten lali nunas geng rena sinampura santukan sampun janten makeh makekirangnyane inggihan indik katunan genah, katunan panyanggra, katunan panamyu miwah sane lianan santukan doh wiakti, tan prasida nagingin sakadi pangarsan ida dane.

Salanturnyane mangda sueca ida dane para sameton titiang jagi iring titiang ngastawa ring Ida Sang Parama Kawi, dumogi acara wanti warsa rahinane mangkin manggihin dirgahayu, labda karya tur sidaning don.

Atur uningayang titiang ring ida dane makasami, sajeroning nyanggra wanti warsa sane kaping pat belas puniki kadagingin antuk makudang-kudang pacentokan, gotong royong kebersihan desa, taler kajangkepin antuk ngaturang punia amatra ring panti werda majeng ring anak lingsir sane patut polih uratian iraga sareng sami.

Mungguhing prabea sane kaanggen nyanggra acara wanti warsa rahinane mangkin wantah saking urunan miwah kas sekaa truna truni, katambahin antuk paica lascaria saking krama Banjar Buruan Kaja. Mangda taler sauninga, sekaa truna truni sane iring titiang natak panes tis ring lingkungan banjar iriki akehnyane seket diri. Lanang telung dasa diri, istri sduang dasa diri.

Salanturnyane titiang makesami iriki nunas mangda sueca Bapak Perbekel pinaka manggala praja ngicenin tuntunan, pawisik, pawarah-warah, mangda prasida titiang iriki salung-lung sabayan taka paras-paros sarpanaya, tur sida ngulati sane mawasta "matuha, migasa, mawerdya" sayan duur yusane, sayan urati miwah gelitik tur prasida sayan limbak ring sajeroning sakancan utsaha. Taler jagi aturin titiang Bapak Perbekel jagi motong tumpeng pinaka cihna acara wanti warsa Sekaa Truna Truni Yowana Mandala Banjar Buruan Kaja sampun mamargi.

Titiang pinaka prawartaka wanti warsa ngaturang suksmaning manah antuk uratian ida dane para sameton sinamian taler nenten lali titiang nunas geng rena sinampura antuk makekirangannyane. Titiang sineb antuk Parama Shanti,

"Om Santih, Santih, Santih Om"

SARASWATI

Inggih Nawegang Titiang

Matuk ring Para Atiti Miwah Uleman sane Wangiang Titiang

Dewan Juri sane Baktinin Titiang

Miwah Para Semeton Lanang-Istri sane Tresnesihin Titiang

Pinih ajeng lugrayang riin titiang ngaturang pangastuti majeng ring Ida Sang Hyang Widhi Wasa duaning majanten wantah sangkaning asung kerta wara lugrahan Ida mawinan titiang miwah Ida-dane mangguh karahajengan sekadi mangkin.

Om Suastyastu,

Ida-Dane Semeton Sinamian sane Wangiang Titiang

Manut baos sang maraga pawikon, umat Hindune astiti bhakti ring Ida Hyang Widhi sane kabaos maraga Sang Hyang Tunggal. Sakewanten sang maraga wicaksana maosang antuk makudang-kudang parinama. Sinalih tunggil parinamannyane sane kaangken pinake Dewa Pencipta Ilmu Pengetahuan ketah kabaos Ida Sasuhunan Sang Hyang Aji Saraswati.

Manut daging kecaping sastra aji agama, umat Hindune nyanggra piodalan Saraswati nganem sasih apisan inggih punika nemonin rahina Saniscara Umanis Wuku Watugunung. Punika kaangken pinaka rahina pamijilan pangweruh. Ring rahina punika makasami umat Hindune kapatut ngaturang pangubakti ring Ida Sang Hyang Widhi pinaka utpeti utawi pencipta ilmu pengetahuan. Yadian sang maraga dokter, guru, murid, petani, bingkil, miwah sane lianan makasami patut sareng nyanggra piodalan Saraswati riantuk makasami madue pangweruh miwah kawagedan sane kapaica olih Ida Sang Hyang Aji Saraswati.

Ida Dane, miwah Sameton Pamilet sane Kasumayang Titiang

Tatujon nyangra rahina piodalan Saraswati nenten ja tios wantah ngaturang parama suksma ring Ida Hyang Widhi santukan Ida sueca mapaica pangweruh ring pretakjana Hindune saha mangda sida nglantur pasuecan-Ida gumanti wenten anggen ngruruh pangupajiwa. Riantuk utama pisan kawigunan kaweruhane majeng ring kahuripan druene, punika mawinan Ilmu Pengetahuane kaniyasa utawi kalambangin antuk Dewi Saraswati.

Ring kecaping sastra Sarasamuccaya wenten kaunggahang mungguing anake sane nenten madue kaweruhan tan pendah kadi anak buta. Lamunapi menawi sengsaran kayun anake yening dumateng dados anak buta? Asapunika taler kocap laran kayun anake sane nenten madue kaweruhan. Kaweruhan kocap pacang prasida pinaka titi pangancan miwah pinaka gegamelan sane pacang sida nganterang i manusa ngicalang kasengsaran uripnyane. Punika mawinan nenten wenten anake nyadia dados anak belog utawi tambet. Makasami mapangapti mangda kasidan dados anak wikan utawi ririh. Majanten mangda setata jemet malajahang raga saha nenten lali setata ngastiti ring Ida Hyang Widhi Wasa, mamuja Ida Sang Hyang Aji Saraswati.

Ida Dane Pamiarsa Sinamian sane Wangiang Titiang

Titiang naenin miragi gatra mungguing meseh i manusa sane utama wantah ketambetan. Nenten pisan wenten nandingin saktin katambetane punika. Duaning asapunika anake sane kaliput dening katambetan majanten pacang akehan maparilaksana sane dudu utawi nenten rahayu. Yening wenten anak wikan maparilaksana sekadi anak tambet, janten dados ipun kabaos anak belog. Wenten malih kecaping sastra sane maosang mungguing wiwit suka dukane wantah katambetan. Katambetan punika metu saking kaloban, taler loba punika metu saking katambetan. Dadosipun wantah katambetan jatinnyane sane mawinan manusane mangguh sengsara.

Yening selehin pisan makasami kahuripan punika madasar antuk sengsara. Mawinan kabaos punarbawa utawi samsara. Punika mawinan ring lambang Saraswatine wenten Genitri (rantai) sane nyinahang pengetahuane punika langgeng nenten telas-telas antuk mlajahin. Yadin ririh enu liu ane patut plajahin. Asapunika limbaknyane pangweruhane punika. Duaning asapunika para sisia makasami mangda setata siaga jemet mlajahang raga sinambi nenten surud-surud ngastiti ring Ida Hyang Aji Saraswati.

Kadi asapunika titiang presida matur-atur ring galahe sane becik puniki. Maka kirang langkung atur titiang, nenten lali titiang ngalungsur geng rena sinampura. Dumogi sangkaning sih Ida Hyang Widhi Wasa mawinan punapa-punapi sane aturang titiang iwawu wenten pikenohnyane.

Om Santih, Santih, Santih Om.